ကလေးဆန်တဲ့အမှားတွေကြောင့် ၆ ပွဲဆက်နိုင်ပွဲရပ်တန့်ခဲ့ရတဲ့ ဘာစီလိုနာ
ဘာစီလိုနာဟာ ယခုရာသီ လာလီဂါမှာ ရှုံးပွဲမရှိသေးပေမယ့်လည်း အင်္ဂါနေ့ညနေမှာတော့ မာယော့ကာနဲ့ ၂-၂ သရေကျခဲ့ပြီးနောက် ၆ ပွဲဆက် နိုင်ပွဲစံချိန်ကတော့ ရပ်တန့်သွားခဲ့ရပြီ ဖြစ်ပါတယ်။
အိမ်ရှင်တွေဟာ ဗီဒတ် မူရီကီနဲ့ အက်ဘ်ဒွန် ပရတ်စ်တို့ရဲ့ သွင်းဂိုးတွေကြောင့် ၂ ကြိမ်အထိ ဦးဆောင်နိုင်ခဲ့ပေမယ့်လည်း ဘာစီလိုနာအတွက် ရာဖင်ညာနဲ့ ဖာမင် လိုပက်ဇ်တို့က ၂ ကြိမ်စလုံးကို ပြန်လည် ချေပပေးနိုင်ခဲ့တာဖြစ်ပါတယ်။
ဘာစီလိုနာအတွက်တော့ စိတ်ပျက်စရာ ညနေခင်း ဖြစ်ခဲ့ပြီး နည်းပြ ဇာဗီ ဟာနန်ဒက်ဇ်က ပွဲအပြီးမှာ မီဒီယာတွေကို ၎င်းရဲ့အသင်းက အနိုင်ရခဲ့သင့်တဲ့ပွဲဖြစ်တယ်လို့ ပြောကြားခဲ့ပေမယ့်လည်း မိနစ် ၉၀ စလုံးမှာ အမှားတွေ အများကြီး လုပ်ခဲ့မိတယ်လို့ ခံစားခဲ့ရတာဖြစ်ပါတယ်။
“ဒါက မလုံလောက်တဲ့ရမှတ်ပါ။ အဲဒါကလည်း ကျွန်တော်တို့ရဲ့ အမှားကြောင့်ပါ။ သူတို့သွင်းခဲ့တဲ့ ဒုတိယဂိုးက ကလေးဆန်တဲ့အမှားကြောင့် ပေးခဲ့ရတာပါ။”လို့ ပြောဆိုခဲ့တာဖြစ်ပြီး ဇာဗီအနေနဲ့ မာယော့ကာရဲ့ ပထမဆုံးသွင်းဂိုးဟာ ခံစစ်ပိုင်းမှာ ရှုပ်ထွေးခဲ့ရာကနေ ပေးခဲ့ရသလို ဒုတိယဂိုးကလည်း အဝေးဘောကနေ ပေးခဲ့ရတာကြောင့် ဒေါသထွက်ခဲ့မှာ ကျိန်းသေပါတယ်။
ဘာစီလိုနာအနေနဲ့ နိုင်ပွဲ လျင်လျင်မြန်မြန် ပြန်လည်ရယူနိုင်ဖို့ မျှော်လင့်နေမှာဖြစ်ပြီး သောကြာနေ့ အိုလံပစ်ကွင်းမှာ ဆီဗီလာကို ရင်ဆိုင်သွားရမှာ ဖြစ်ပေမယ့်လည်း ဆီဗီလာဟာ အင်္ဂါနေ့က အလွန်ကောင်းမွန်တဲ့ နိုင်ပွဲကြောင့် ယုံကြည်ချက် မြင့်မားစွာနဲ့ ယှဉ်ပြိုင်သွားမှာဖြစ်ပါတယ်။
