ဘန်လေကို အနိုင်ယူပြီး ဇယားထိပ်မှာ စီးတီးကို ဖင်ပူအောင် ထိုင်ခွင့်မပေးခဲ့တဲ့ လီဗာပူးလ်
စနေနေ့ည ၉ နာရီ ၃၀ မိနစ်မှာ ကစားခဲ့တဲ့ လီဗာပူးလ်နဲ့ ဘန်လေတို့ရဲ့ ပွဲစဉ်မှာ အိမ်ရှင် ကြိုးကြာနီတွေက အန်းဖီးမှာ ကွန်ပနီရဲ့အသင်းကို ဒုတိယပိုင်း သွင်းဂိုးတွေနဲ့ အနိုင်ယူပြီး အမှတ်ပေးဇယားထိပ်ကို ပြန်လည်တက်လှမ်းနိုင်ခဲ့ပါတယ်။
လီဗာပူးလ်ဟာ ပွဲစကစားချိန်ကတည်းက အဲဗာတန်ကို အနိုင်ယူပြီး ဇယားထိပ်ကို တက်လှမ်းသွားခဲ့တဲ့ မန်စီးတီးကြောင့် အပိုဖိအားတွေနဲ့ ကစားခဲ့ရပြီး ပထမပိုင်း ၃၁ မိနစ်မှာ ဂျိုတာက ဦးဆောင်ဂိုး သွင်းယူသွားချိန်အထိ အရာအားလုံး အဆင်ပြေပြေဖြစ်သွားလိမ့်မယ်လို့ ထင်ခဲ့တာဖြစ်ပါတယ်။
ဒါပေမယ့်လည်း ပထမပိုင်းပြီးဆုံးခါနီး ၄၅ မိနစ်မှာ အိုရှေးက ဘန်လေအတွက် ထောင့်ကန်ဘောကနေတဆင့် ခေါင်းတိုက်ပြီး ချေပဂိုး သွင်းယူပေးသွားခဲ့တာကြောင့် ပထမပိုင်းဟာ ၁-၁ နဲ့ ပြီးဆုံးခဲ့ရတာဖြစ်ပါတယ်။ ဒုတိယပိုင်းမှာ လီဗာပူးလ်ကပဲ ဆက်လက် အသာစီးနဲ့ ကစားနိုင်ခဲ့ပြီး ၇ မိနစ်အကြာမှာပဲ လူးဝစ္စ ဒီယက်ဇ်က အဲလီးယော့တ်ပေးပို့လိုက်တဲ့ ဘောလုံးကို အနီးကပ်ခေါင်းတိုက်သွင်းယူခဲ့တာဖြစ်ပါတယ်။
VAR က လူကျွံဘောရော ပြစ်ဒဏ်ကျူးလွန်မှုပါ ဖြစ်နိုင်ခြေအတွက် စစ်ဆေးခဲ့ပေမယ့်လည်း အမှားအယွင်း မရှိခဲ့တာကြောင့် ဂိုးခွင့်ပြုပေးခဲ့ပြီး ၆၃ မိနစ်မှာ နူးညက်ဇ် အပိုင်အခွင့်အရေးရခဲ့ပေမယ့်လည်း ထရက်ဖို့ဒ်ကာကွယ်နိုင်ခဲ့တာဖြစ်ပါတယ်။
ဒါပေမယ့်လည်း စည်းကြပ်ဒိုင်က လူကျွံအလံထောင်ခဲ့တာဖြစ်ပြီး စက္ကန့်ပိုင်းအကြာမှာ ဖိုဖာနာက ကွမ်ဆာရဲ့အမှားကနေ ဂိုးသမား ကယ်လေဟာနဲ့ တစ်ဦးချင်း ဂိုးသွင်းယူဖို့ ကြိုးပမ်းခဲ့ပေမယ့်လည်း လီဗာပူးလ်ဂိုးသမားက ကာကွယ်နိုင်ခဲ့တာဖြစ်ပါတယ်။
၇၉ မိနစ်မှာတော့ ဒါဝင် နူးညက်ဇ်က ဟာဗီး အဲလီးယော့တ်ရဲ့ ဖြတ်တင်ပေးပို့မှုကနေတဆင့် ဂိုးဘယ်ဘက်အောက်ထောင့်ကို ခေါင်းတိုက်သွင်းယူပြီး လီဗာပူးလ်ကို အနိုင်သေချာစေခဲ့တာ ဖြစ်ပါတယ်။ လီဗာပူးလ်ဟာ ဘန်လေကို အန်းဖီးမှာ နိုင်ပွဲရယူနိုင်ခဲ့တာကြောင့် အဲဗာတန်ကို အနိုင်ယူပြီး အမှတ်ပေးဇယားထိပ်ဆုံးကို ယာယီတက်လှမ်းနိုင်ခဲ့တဲ့ မန်စီးတီးကို ပြန်ကျော်ဖြတ်ပြီး ဇယားထိပ်နေရာကို ပြန်လည်သိမ်းပိုက်နိုင်ခဲ့ပြီဖြစ်ပါတယ်။
REF: INTERNET SOURCES
PHOTOS CREDIT TO OWNERS
