စင်ရော်တွေကို ၄ ဂိုးပြတ်ကြိတ်ပြီး ဂန်းနားတွေနဲ့ ၁ မှတ်အကွာကို ပြန်ရောက်လာတဲ့ စီးတီး
မန်ချက်စတာစီးတီးဟာ အေးမက်စ်ကွင်းမှာ ဘရိုက်တန်ကို ကြာသပတေးနေ့ညက ၄-၀ နဲ့ ဂိုးပြတ်နိုင်ပွဲရယူနိုင်ခဲ့ပြီးနောက် အမှတ်ပေးဇယား ဦးဆောင်သူတွေဖြစ်တဲ့ အာဆင်နယ်နဲ့ ၁ မှတ်အကွာကို ပြန်လည်တက်လှမ်းနိုင်ခဲ့ပါတယ်။
မန်ချက်စတာစီးတီးက ၃-၀ နဲ့ ဦးဆောင်နိုင်ချိန်ကတည်းက ဒုတိယနေရာက လီဗာပူးလ်ကို ကျော်ဖြတ်ပြီး အာဆင်နယ်နဲ့ အနီးဆုံးနေရာကို ပြန်ရောက်လာတာကြောင့် အန္တရာယ်ရှိတဲ့ပွဲတစ်ပွဲကတော့ အောင်အောင်မြင်မြင်နဲ့ ပြီးဆုံးခဲ့ပြီဆိုတာ ထင်ရှားခဲ့တာဖြစ်ပါတယ်။
ဒီဘရိုင်းနားရဲ့ ပထမပိုင်း ၁၇ မိနစ်မှာ သွင်းယူခဲ့တဲ့ အဖွင့်ဂိုးနဲ့ မန်ချက်စတာစီးတီးတို့ ဦးဆောင်နိုင်ခဲ့တာဖြစ်ပြီး အဲဒီသွင်းဂိုးက ဘယ်လ်ဂျီယမ်ကြယ်ပွင့်အတွက် ပရီးမီးယားလိဂ် ၆၈ ဂိုးမြောက်သွင်းဂိုးဖြစ်ပါတယ်။
နောက်ထပ် ၉ မိနစ်အကြာမှာ ဖီးလ် ဖိုဒန်က အငြင်းပွားဖွယ် နောက်ထပ် ဦးဆောင်ဂိုးကို သွင်းယူပေးသွားခဲ့တာဖြစ်ပြီး အင်္ဂလန်တောင်ပံကစားသမားဟာ ကိုယ့်ဘာသာ ခြေချော်လဲကျခဲ့ပုံပေါ်ခဲ့ပေမယ့်လည်း ဒိုင်လူကြီး ဂျားရတ် ဂီးလတ်က မန်စီးတီးတို့ကို အလွတ်တည်ကန်ဘောပေးခဲ့တာဖြစ်ပါတယ်။
ဖိုဒန်ရဲ့ အလွတ်တည်ကန်ဘောကနေ တိုက်ရိုက်ကန်သွင်းယူမှုက ပါစကယ် ဂရို့စ်ကို ထိပြီး လမ်းကြောင်း ပြောင်းသွားခဲ့တာကြောင့် ဂိုးသမား ဂျေဆင် စတီးလ် ဟန်ချက်ပျက်ပြီး ဂိုးထဲ ဝင်သွားခဲ့တာဖြစ်ပါတယ်။
ဘရိုက်တန်အတွက် ပြန်လာဖို့ မျှော်လင့်ချက်ကို နောက်ထပ် ၈မိနစ်အကြာမှာ ဖိုဒန်ရဲ့ ဂိုးအောက်ထောင့်ကို အဆုံးသတ်ကန်သွင်းယူမှုက ပျောက်ကွယ်သွားစေခဲ့ပြီး ဒီဇာဘီရဲ့အသင်းဟာ ပထမပိုင်းမှာတင်ပဲ ၃-၀ နဲ့ ရှုံးနိမ့်နေခဲ့တာဖြစ်ပါတယ်။
ဒုတိယပိုင်း ၆၂ မိနစ်မှာ ယူလီယန် အယ်လ်ဗာရက်ဇ်က မန်ချက်စတာစီးတီးတို့အတွက် စတုတ္ထမြောက်နဲ့ နောက်ဆုံးသွင်းဂိုးကို သွင်းယူပေးသွားခဲ့ပြီး ဂွါဒီယိုလာရဲ့အသင်းက အရေးကြီးတဲ့ အဝေးကွင်းနိုင်ပွဲကို ရရှိခဲ့တာဖြစ်ပါတယ်။
REF: INTERNET SOURCES
PHOTOS CREDIT TO OWNERS
